Preguntanan frekuente

Preguntanan frekuente

Akinan bo ta haña algun pregunta tokante Amor i Sèks ku hóben sa tin. Nan ta parti den seis tema. Primi riba  e pregunta pa lesa e kontesta.

Amor

Kon mi ta pega un hende?

Tin hopi manera pa konkistá un hende. Wak otro den wowo ta un kos ku ta traha kasi semper anto duna kòmplimènt. Lesa e tepnan akinana pa mas manera di konkista un hende.

Mi tin un relashon pero mi gusta un otro hende. Kiko mi hasi?

Pensa bon promé bo kuminsá algu ku un otro hende. Kòrta orea kasi semper ta kibra bo relashon. Pensa bon: mi ke kaba ku e relashon aki?

Mi frei ta bira yalurs ora mi papia ku otro hende. Kiko awor?

Hopi biaha ta inseguridat ta hasi hende yalurs. Purba haña sa dikon bo frei ta insigur. Papia kuné tokante insiguridat i yalurs.

Kon mi ta hasi mi relashon un éksito?
  • Sea kariñoso ku otro. Perkurá pa bosnan por konfia otro, kuida otro bon anto duna otro kòmplimènt.
  • Papia ku otro. Mustra interes den otro, respetá e otro su opinion, bis'é ora un kos ta molestiá bo i sea honesto ku otro.
  • Hasi kos dushi huntu. Sorprendé otro anto bai keiru huntu, pero kòrda riba bo mes bida i bo amigunan si.
Mi ta un mucha muhé di dieshete aña anto mi gusta mi mihó amiga. Ta lesbiana mi ta?

Por ta. Den bo adolesensia bo por haña sentimentunan fuerte. Bo ta gusta yen hende, podisé tantu mucha hòmber komo mucha muhé. Bo gusta un hende di bo mesun sekso anto bo tin gana di hasi sèks kuné? Podisé bo ta homoseksual òf lesbiana.

Mi ta un mucha hòmber di dieshete aña anto mi gusta mi mihó amigu. Ta homoseksual mi ta?

Por ta. Den bo adolesensia bo por haña sentimentunan fuerte. Bo ta gusta yen hende, podisé tantu mucha hòmber komo mucha muhé. Bo gusta un hende di bo mesun sekso anto lo bo tin gana di hasi sèks kuné? Podisé bo ta homoseksual.

Deseo i límite

Kiko bo por hasi pa laga sa kiko bo no ke durante sèks?

Sea hopi kla ora bo bisa kiko bo no ke. Mas lihé bo bisa, mas kla e ta pa e otro. E otro mester por vigilá siñalnan ku ta laga sa kiko bo gusta i kiko bo no gusta. Tin biaha no ta fásil pa bisa kiko bo ke òf no ke. Lesa algun tep akinan.

Kon bo por laga sa kiko bo gusta durante sèks?

Pone atenshon na bo deseonan, si bo ta sinti dushi i bon, e kos ta bon. Ta normal ku tin biaha bo tin hopi gana di un kos anto e otro biaha niun tiki gana.  Laga sa bon kla den bo relashon kiko bo ke i kiko bo no ke. Bo pareha mester respetá bo.

Asina bo a bisa si, bo mester bai 'all the way'?

No, esei no ta asina. Semper bo por stòp. No ta importante kon leu bosnan a bai. Bo mester ta kla si. Asina ta mas fásil pa e otro.

Kon mi ta ripara kiko mi frei gusta i kiko no?

Pone bon atenshon na siñalnan di bo frei anto puntr'é kiko e ke. Bo por ripara ku bo frei ta tuma ménos inisiativa, ta bira ménos kayente, no ta sunchi bèk òf ta inventá motibu pa no sèks ku bo, por ta siñalnan ku e ta usa pa bisa no. Si bo frei ta yama bo afó, ta mishi ku bo hopi, ta purba sedusí bo anto bo ta mir'é ta gosa ora bosnan ta sèks kasi sigur e ta hañ'é bon i dushi.

Kiko hasi ora mi ripara ku mi frei ta duda?

Si bo frei ta duda òf bo ta mira siñal, puntr'é kiko e ke. Papia di kiko bo ke hasi i kiko no. Tin biaha un Si ke men un No òf por bira un no hopi lihé. P'esei bo mester keda vigilá su siñalnan.

Ki ora por bisa un hende a pasa bo límite?

Por trata di kos ku nan bisa, mishi ku bo òf mishi hopi íntimo. E por pasa hasiendo sèks tambe. Otro ehèmpel por ta: plama un potrèt seksual di bo, frega na bo kurpa sin bo ke òf un pareha ku no ta tende ora bo bisé ku bo no ke sèks. Akoso, violá i stalking ta formanan mas severo di pasa límite.

Mi frei ke drumi ku mi pero mi no ta kla. Kiko mi hasi?

Laga e sa ku bo no ke ainda. Nunka no ta bon pa un hende obligá bo hasi un kos. Hasié ora bo ta kla pa hasié. Ta bo kurpa. Bo por bisé si kiko si bo ke hasi.

Kon mi ta rekonosé un loverboy?

Un loverboy lo purba konkista un mucha muhé ku kòmplimènt i regalo pa despues oblig'é bai den prostitushon òf dil droga. Hopi biaha loverboynan ta tira riba mucha muhénan insigur, ku ta sinti nan mes no komprendé òf ku no tin konfiansa den nan mes.

Mi amiga a kai den gara di un loverboy. Kiko mi mester hasi?

Buska yudansa mesora. Papia ku un hende di konfiansa manera un amiga, un famia, un dosente òf bai polis.

Malesa transmití seksualmente, MTS

Kiko ta un malesa transmití seksualmente?

Un malesa transmití seksualmente ta un malesa ku ta pega via sèks. E ta un infekshon ku por haña i pasa pa un otro durante sèks.

Kon bo ta pega ku un MTS?

Bo por pega ku un malesa transmití seksualmente hasiendo sèks no protehá. Sèks no protehá ta sèks sin kondon.

Dikon malesa transmití seksualmente ta asina malu?

Bo por haña yen keho ferfelu manera kishikí, kimá i doló den bo barika. E por tin konsekuensha serio. Bo por esta bira infértil, ke men ku bo no por haña yu mas. Ta importante pa sa na ora si bo ta infektá pa laga trat'é. Bo a hasi sèks sin protekshon? Bai kontrolá.

Mi no ta sinti nada. Mi por tin un malesa transmití seksualmente tòg?

Si. Hopi biaha bo no sa ku bo a pega ku un MTS. Si bo a yega di hasi sèks no protehá bai kontrolá. Asina bo sa sigur ku bo ta infektá si òf no.

Ta manera mi ta bai di un infekshon di hèrpes p'e otro. Mi ta bira loko. No por hasi algu?

Lástimamente no tin un remedi ku ta saka e hèrpes fo'i bo kurpa. Tin un tratamentu si ku hasi e ataka di hèrpes ménos fuerte i pon'é dura ménos. Puntra bo dòkter di kas.

Un líkido ta sali fo'i mi pénis. Mi frei no ta sinti nada. Mi tin un malesa transmití seksualmente?

Esaki por ta un MTS manera gonorea, drep. Esaki ta un infekshon ku por duna keho den un par di dia. Por trat'é bon ku antibiótika. Ta importante pa bo frei bai kontrolá.

Schimmel, beskein of fungus, ta un malesa transmití seksualmente?

No, schimmel no ta un MTS, pero e por duna yen keho ferfelu manera kishikí, lep di vulva hinchá anto líkido for di bo órgano seksual. Bo por haña schimmel dor di usa antibiótika òf pil. Dor di laba bo vagina ku habon, kana ku tampòn muchu largu anto aktonan seksual manera hinka dede.

Kon sa si bo tin un malesa transmití seksualmente?

Bo ta sa hasiendo un tèst. Na Hulanda bo por hasié grátis i anónimo un kaminda banda di bo kas. Otro partinan di Reino bo por bai bo dòkter di kas òf Famia Planiá. Hopi biaha bo no sa mes ku bo tin un malesa transmití seksualmente. Pero bo por pega otro hende si. Tin algun MTS ku por hasi bo infértil òf por krea yen infekshon ferfelu. Ke men bai wak lihé. Si bo a hasi sèks no protehá, bai kontrolá.

Kontrolá pa MTS ta hasi doló?

Tin biaha. Ta dependé pa kua malesa transmití seksualmente ta bai kontrolá. Nan por kue sanger, kontrolá urina òf saminá na kurpa. Ora di kue sanger e angua por hasi un tiki doló. Ora di saminá na kurpa  kontrolá bo kanal di urina por ta ferfelu.

Na estado

Kon mi por sa si ma sali na estado?

Hasi un tèst di embaraso. Bo por hasi un tèst di embaraso for di e dia ku bo mester a haña bo menstruashon.

Mi no a haña mi menstruashon? Na estado mi ta?

Por ta pero no mester. Tin biaha otro motibu, manera strès, por tarda bo menstruashon. Hasi un tèst di embaraso pa sa sigur si bo ta na estado. Si resultá ku bo no ta na estado bai bo dòkter di kas pa wak kua otro motibu por a stroba bo menstruashon. 

Unda mi por kumpra un tèst di embaraso?

Bo por kumpra un tèst di embaraso na botika i supermerkado na Hulanda, na e islanan na botika i na Famia Planiá.

Mi ta na estado. Kiko awor?

Tin dos opshon: Bo por haña e yu òf interumpí e embaraso. Lesa mas na ‘Na estado. Kiko awor?’.

Mi ta na estado. Mi no sa kiko hasi: haña e yu òf hasi aborto. Ken por yuda mi?

Bo dòkter di kas por yuda bo. Na Hulanda bo por aserka klínika di aborto pa mas informashon òf na FIOM. Tambe tin un forum i chatbox pa mas yudansa den bo desishon. Na e islanan bo por aserka bo dòkter di kas.

Mi ta na estado pero no ke un yu. Kiko mi hasi?

Bo por terminá bo embaraso hasiendo aborto. Mas tempran den bo embaraso bo ta mas fásil e ta. Ta un desishon kompliká si. Pensa bon. Papia di e posibilidatnan ku bo dòkter, ku amigu òf famia òf un klínika di aborto.

Aborto. Ta kiko e ta anto?

Aborto ta ora bo kaba ku un embaraso. Esei por ku un píldora di aborto òf otro manera (manera chupa saka). Kua manera ta skohe ta dependé kon leu bo ta kaba den bo embaraso.

Sèks

Kon mi ta hasi sèks mas dushi?

Purba algu otro: sedusí otro na un otro manera òf usa otro posishon. Kont'é bo fantasia tambe ta hasi e kos mas dushi. Gosa!

Tur hende rònt di mi a hasi sèks kaba, ami so no. Ta normal ku mi no tin gana den sèks ainda?

Ta masha normal. Sèks bo mester hasi ora bo mes ke di bèrdat anto tin un bon pareha pa hasié kuné. Algun hóben ta kuminsá ku sèks mas lat den bida. No tin nada malu na esei.

E promé biaha ta hasi doló?

Si e mucha muhé ta relahá i kayente, promé biaha no ta hasi doló. Si bo ta tenso, bo vagina por ta seku i tenso ku ta pone hasi doló. E ora ei e flishi, e señorita por sker i hasi doló. E promé biaha semper ta tenso ku chèns grandi pa esaki pasa. Tuma boso tempu pa hasié pa e no hasi doló.

Kiko ta bírgen?

Un bírgen ta un mucha hòmber òf muhé ku no a tene relashon seksual ainda. Un otro palabra pa tene relashon ta chinga. E promé biaha ku bo tene relashon, bo no ta bírgen mas. Ta bisa tambe e mucha muhé a pèrdè su señorita.

Kiko muhénan lesbiana ta hasi den kama?

Dos mucha muhé por hasi tur sorto di kos manera chupa lenga, karisia, hinka dede òf kome den tayo, kome lèrchi. Ora dos mucha muhé ke chinga nan por usa nan dedenan, un dildo of vibrator.

Mi frei gusta wak pòrno na riba Internet. Mi no gusta e kos ei. Kiko mi hasi?

Laga bo frei sa ku bo no gusta ku e ta wak pòrno riba Internet. Papia bèrdat, esta si esaki ta hasi bo yalurs òf insigur. Bo mester tende tambe si kiko e ta pensa di pòrno. Pensa huntu un solushon ku ta bon pa bosnan tur dos.

Mi frei ke pa mi hunga ku mi mes dilanti webcam. Mi no ke pero mi tin miedu pa e no kibra ku mi. Kiko mi hasi?

Nunka hasi un kos ku bo no ke. Si bo ta duda tuma bo tempu i pensa pero no hasié ainda. Imáhen riba webcam por tin konsekuensha ferfelu. Den relashon nunka no ta bon pa hende fòrsa bo hasi algu seksual.  Papia ku bo frei. Bisé dikon bo no ke. E ke kibra ku bo? Laga numa paso e no tabata interesá den bo di bèrdat.

Ma basilá ku un gai ora nos tabata chat. Awó e ta sigui anto ami no ke. Kiko mi hasi?

Bisé ku bo no ta kere bosnan dos por bira algu. No ta dushi p'e pa bo rechas'é pero ta mihó bo bisé na un manera kla i amabel. Bosnan por asta bira amigu. Si e sigui molestiá bo riba chat blòki'é.

Kiko mucha hòmbernan homoseksual ta hasi den kama?

Dos mucha hòmber por hasi tur sorto di kos manera chupa lenga, karisia, masturbá otro ke men hala puñete, chupa i chulia. Ora nan tene relashon, nan ta hasié anal, di patras.

Mi a kita paña dilanti chat pa mi frei anto m'a arepentí. Kiko awor?

Bisa bo frei ku bo no ke hasié mas anto kont'é kon malu bo ta sinti bo. Si bo frei stima bo e ta respetá esei. Si e kibra ku bo, e no tabata interesá den bo di bèrdat.

Sèks seif

Ma haña un malesa transmití seksualmente ounke semper ma sèks protehá. Kon por ta?

Sèks protehá ta ora bo usa kondon ora bo tene relashon seksual anto sòru pa no haña spèrma òf sanger di menstruashon den bo boka. Asina bo ta protehá konta HIV, klamidia i gonorea. Vírus i bakteria ku ta kousa malesa transmití seksualmente por drenta bo kurpa na otro manera tambe. Manera ora bo masturbá otro: hala puñete òf hinka dede.

Mi tabata tin sèks no protehá ku un mucha muhé, ma pishi despues laba mi pénis hopi bon. E ta yuda?

No, pishi anto laba bo pénis despues ku bo a kore riesgo no ta yuda ku nada. Si e mucha muhé tin un malesa transmití seksualmente bo por a pega.

Mi frei ke sak'é promé ke bin. Ta sufisiente protekshon?

No, esei no ta bon protekshon. Ora bo frei saka su pénis for di bo vagina promé ku e bin, e baba si a bai den bo vagina kaba. Bo por pega ku malesa i sali na estado. E baba por pega bo ku malesa, Si bo no a usa kondon bo por sali na estado. Por tin simia den e baba. Pil ta protehá kontra embaraso, pero no kontra malesa transmití seksualmente.

Ta bèrdat ku tin biaha e kondon no ta pas?

Tin kondon den diferente tamaño. Pa tur mucha hòmber tin un ku ta pas. Skohe e tamaño adekuá si pa e no primi ni sker.

Mi ta haña sèks sin kondon mas dushi. Kon mi por hasié tòg sin riesgo?

Esei por solamente si bosnan tur dos ta hasi sèks ku otro so anto ta usa un antikonseptivo (manera pil òf spiral) pa no sali na estado. Promé ku bo stòp di usa kondon bo mester ta sigur ku niun di bosnan no tin un malesa transmití seksualmente. Mester kontrolá pa MTS. Despues bosnan tur dos mester ta monógamo (kier men no hasi sèks no protehá ku otro hende) sino bo por pega tòg anto pega bo frei. Pa no sali na estado e mucha muhé mester usa un antikonseptivo si.

E kondon ta slep kai ora nos ta sèks. Kiko m'a hasi robes?
  • Podisé bo no a lora e kondon te abou. Bo mester lora  kondon te abou na bo pénis.
  • Podisé e kondon ta muchu grandi.
  • Podisé bo no a tene e kondon bon ora ba saka bo pénis. Tene e kondon bon ora bo ta sak'é.
Kada bes e kondon ta sker, Kiko mi ta hasi robes?
  • Bo a laga aire den e pida kabes ariba anto e por bula. Wak e pelíkula pa siña kon bo mester tene e punta ariba di e kondon ora ta lor'é.
  • E mucha muhé ta muchu seku. Tuma mas tantu tempu pa chulia promé òf usa un lubrikante.
  • Si ta sèks anal podisé bo no a usa sufisiente lubrikante.
  • Bo a usa e mesun kondon muchu largu. Ora ta sèks largu kambia kondon kada 15 minüt.
  • Podisé e kondon a pasa fecha. Kontrolá e fecha di vensementu.
  • E kondon no ta aprobá. Na Hulanda usa solamente kondon ku e logo CE
  • E kondon a bira muchu kayente. Warda e kondon na un logá fresku.
  • E kondon por ta muchu smal. E kondon ta muchu chikí ku ta pone primi òf sker.
  • No usa dos kondon riba otro.
Kon ta bisti kondon?

Bisti kondon no ta fásil semper. Wak e página 'Kon usa kondon?' pa mas informashon i un pelíkula ku instrukshon.

Ma kaba di kuminsá bebe pil. Ki ora e ta konfiabel?

Kuminsá bebe pil e promé dia di bo menstruashon. Asina e ta konfiabel. Si bo a kuminsá despues usa un kondon aserka durante e promé luna.

Ma lubidá di bebe mi pil? Kiko mi hasi?

Ta dependé di ki dia bo a lubidá e pil. Lesa e instrukshon di bo pil òf wak riba www.noodpil.nl. Podisé bo mester usa un morning-afterpil.

Ta dependé ki dia ba lubidá. Lesa e instrukshon ku ba haña huntu ke pil òf wak riba www.noodpil.nl. Podisé bo mester bebe un Morning After Pil.

Kon mi ta hasi pa no lubidá bebe mi pil?
  • Pone alarma den bo telefon selular.
  • Pone e paki pil banda di bo skeiru di djente òf bo make- up. Asina bo ta kòrda riba dje tur mainta òf anochi.
  • Hasi un repi di pil bo repi di reserva. Kana semper kuné. Asina bo por bebe e pil si bo kòrda mas lat den dia.
  • Skohe un antikonseptivo ku bo no mester kòrda asina tantu riba dje. Wak den e skema aki pa mas informashon di otro antikonseptivo.
Mi no ta kontentu ku pil. Ki otro manera tin?

Wak riba e página "Ki tipo tin" pa mas informashon tokante otro antikonseptivo. Podisé e tèst i site aki por yuda bo skohe un bon antikonseptivo.